Melu Habong Ika' ~Mengutip Serpihan Kenangan~Part 1

Sorry to all readers, for this post I purposely wrote it in Kayan, which is my ‘Mother Tongue/Bahasa Ibunda. I dedicated this post to all Kayans out there, especially to all of my friends. To those who want to read but you are not Kayan, I appreciated it so much. My mother tongue language is easy actually ..so enjoy it..

This song I composed to commemorate each one of you…

Melu Habong Ika’

Lagu&Lirik: Snah Ukong

Copryright Reserved @2008

do anih itam peji

pekeluan hani…

itam peji ngeliah

pekiso’ sayu

dahin melu…o..o

serita’ urip una’

aleng dena’

ji tuk aleng ak hituk

ika’ nah bakeh kui……

peji tei hireh hitih

bi tuk anan jan dara

itu’ petat…o..o

avan ilo pengjam

ilo urip

akui melu habong ika’

o bakeh kui leng kala’ ak nyalam

akui liveng, akui kawah

tegu hituk te’ gaya tuk

pehalam bi tei hapat liran

te’ belua alan..o..o

itu’ hipun kelanget

pesekedep

kerei nih ika’ bakeh

‘au jadi ji kelunan….

aleng meran teneng

melu kui avin ika’

piah kayo’ ngevua

jama dahin hingev

avan nyingo

Lagu anih ak na dahin tuju men lim daha' bakeh kui ha' ino' tua kelo' te'. Hi-hi tua aleng kala' peji sekulah dahin sikep ji dua liap pengjam aleng legak men ba guruk dahik dahin peji kelas dahin lahu peji ngajei dahik una’, hihihihihiiii… Melu lan pah hineng lim itam au lebo halem sekulah dahin kerei nih au nyadui... Te' balei nyadui dahin peritah dahin te' lim kah balei aleng nyadui dahin swasta. Jadi pastor pun te'. Bi'ek daho', kurin daha' deh, akui melu lan hineng lim itam au jadi “'kelunan” men itam sediri dahin daha' aleng jeleng dahin tam, nunan pah te’ hang kelunan leba’(masyarakat) piah kurim Halo' deh, " berbudi kepada nusa dan bangsa". Jadi lio’ kah bareng hadui-hadui aleng en tam na avan ngemaju urip sediri kurang-kurang na', mawi itam jan tulong atau tavin halem ngemjau urip kelunan bangu. Bi, kio' kui, te' kah hadui tam aleng na kenep kelunan ja' tei lema, atau pekenyian tusah aleng en daha’ be’, aleng reti na' hia’ nah itam au tulong daha' peterunga’ tusah ...

Hituk kelo’ yah....anih serita’ tegu sekulah rendah.. Akui sekulah ha’ Sekolah Rendah Kerajaan Long Dupah Uma Juman Belaga.
Serita te' joh ketah ta' sekulah una' anih.. Jam kelo nyam kerei nih, ita’ sediri aleng tei ilo kayo tayun avan na apui ha uma sekulah. Ji lu'ong nyam sekulah mesti ilo 2 kepah kayo' tayun.. Jaaaaaahhh, pektap tua nah ulak tam peji dahin bakeh-bakeh ja' tei ilo kayo' halem uro' tih. Anih avin sekulah jan hipun sukup kelunan kerjah aleng na hadui avin daha’ taja’ kahang.

Men pukol 7 jehima ateng pukol 12.30 ngedo itam sekulah (formal education). Pukol 2 levi ateng pukol 4 levi hia' nah jaka' tam belajar levi. Au anan pukol 4 levi hia' nah jaka' aleng en ukeh avan "Nyadui". Reti na' tegu jaka' anan lim nyam sekulah seng nyadui uro padang sekulah, nubit uro aleng murip te' kebun bunga, lemirik piping aleng te' murip ha' bahe' hungei uma sekulah, mepa parit dahin ngema'ang jaban sekulah. Bi bagi tam, jinun anan ji na’an tusah, en tam na kah hadui tih dahin tangen dahin jinun yan kevah musang te' hang hiveh tam. Lim-lim tuket dahin ketah anan lim kah au jadi guru men itam kerei nih kio’ kui. Anan nah guru aleng na itam nengayet tangen halem sekulah ja itam lebo baya. "Guru" anan lim kah aleng na itam "kebal" peterunga' tusah aleng te' terungan tam kerei nih. Jadi, jinun rugi itam nei men daleh lirin, peletam jayam ha' daleh pasel ilo urip. Jinun tam ngedel peterunga' urip tusah te' unan tam avin itam au pekalei sukup training te' ket aleng nunan.

Te’ pah serita/kisah ita’ ngeliah una’…peharu te’ bato ha’ udik jenawa deh. Mawi hungei pasek ayan na’, jah tei nah kalo’ bakeh kui piah Nancy Maria Thomas, Nancy Hawing, Pauline, kazen Robert, Teke, Jane, Cecilia dahin havo-havo aleng ja’ tei du ha’ Bato’ Aya’ jenawa hudik….aktiviti hia’ nah peharu te’ batok anan..avin hungei pasek lan ayan na’. Kajo pah peharu te’ bato’ anan. Kasi pah hungei tegu anan uk dahin hungei baruk deng kenyung ta’ tua.. Tegu nunan pasek lan ayan hungei avan peharu te’ bato aya’ anan.. Jaaah, peharu nah ita’, hi aleng legak hungei tih kalah kah daha’.

Au anan na keliah ’Bavui’. Hi aleng jadi bavui dahin. hi aleng livoh. Jam kelo’ bakel keliah kalo’ en na’ men piping..? Ujung piping anan en tepa’ ja na’ buret bihi na’ perah mete’ bakeh aleng en ta’ ketiting piping anan hiveng ngeliah ngahep..jah alei na’, lake’ lawen doh lah. Lap ngesem halem hungei nah ita’ mawi jaka’/turn ta’ aleng jadi bavui,..hehehe. yalah bihi ita’ ga’ ”bakel” piping atih kereh... La’ei ta’ ngeliah ”bavui” nan ita’ teso te’ jenawa. Te’ nah jenawa Kayo Taha anun urip Lake’ Gung Talik deh, men inan nah ta’ teso hungei tih. Aktiviti anan pun en ta’ na nyineng gaya ayan hungei loh kah. Hungei mesti aya’ atau pasek-pasek ayan na’, baru ita’ deng teso..Avin mawi na’ nyivo, ju megeru nekering hujung hit bahe’ tih tua nah ita’ ”landing” kan,? Hahahaaa

Au anan keliah ”Teliol” te’ tana tupek bahe’ hungei.. Adai murap-ap tua nah avut ta’, seluel pun jinun te’ banah na’ la’an. Sayu seng pakei seluel, balei tih aweh tua daha’ teliol tana tupek anan, akui ngio’ te’ kah avut balei aleng kahut kurik, adaiii adaaaiiiiiiii...!!!!!

Au anan besei tei kuman bahe’. Hadui anih en ta’ na tegu ita’ au aya’ uk, masuk sekulah menengah – Tingkatan 1. Tei nah kalo’ loh kah, tei besei ha’ Hungei Besua pedong, tei ha’ Hungei Jangan pedong atau pun tei mudik ha’ Hungei Latat. Kuman bahe’, ilo tangoh pako danum, ngejala’ masik, na apui, na sabel hanit-hanit..........sayu dena’ lan jaka’ urip tegu anan... Liveng kui...

Au anan, tegu cuti men Tingkatan 1 ateng kame’ penga persa Tingkatan 5 kame’ peledo...kajo lan jaka’ anan. Kalo’ peledo navo lada, meda lumak koko, ngeluno lada, ngeluno parei navo lumak parei pun tek...Ngeluan lan jaka’ anan.. Jam-jam na’ lim kenangan atau memori anan hia’ nah pengalaman aleng mahel piah kurin daha’ deh ”Tiada ternilai” legah na’. Avin pengalaman anan nah aleng jadi kemahing urip tam do anih. Alem anan, daha’ hadui-hadui luma’ anan pah lahu taja’ jeleng halem urip tam ha’ daleh hudik.

Jadi harep dahin ketalo kui men itam lim ja itam pa'en peju halem urip, tulong hinan taman, tulong harin tulong daha' aleng kapet aleng perlu usu tam. Mina pah aleng deng en tam na tih jan na’ nuno’ kuri, bi aleng penting itam au mejei usu men daha’, piah kurin Lake’ Aya’ aleng kuasa urip tam. Harep kui hia’ nah, ja itam jadi kelunan lan pa'en ateng do baya.....Amen!

tbc....